اسلام آباد۔5اکتوبر(اے پی پی) وزیراعظم محمد شہباز شریف آکھیے استادیں دے جڳ ݙیھاڑ تے اساں انھاں لوکاں کوں خراج تحسین پیش کریندوں جنہاں پاکستان دے مستقبل دی تشکیل تے علم کوں ودھارا ݙیوݨ دے عظیم مشن کوں سر انجام ݙیوݨ دا ٻیڑاہ چاتے ، استاد ساݙے مستقبل دے معمار ہن ،انھاں دیاں کوششاں دے بغیر اساں آپݨی انھاں امنگاں کوں پورا نی کرسڳدے جیڑھی اساں بحیثیت قوم اپݨے کیتے متعین کر رکھئن ۔وزیر اعظم آفس دے میڈیا ونگ توں جاری بیان موجب وزیر اعظم استادیں دے جڳ ݙیھاڑ تے سنھیے اچ آکھیے جو اڄ اساں آپݨی قوم دے مستقبل دے معمار دے طور تے استادیں دی گراں قدر کردار کوں منݨ سانڳے عالمی یوم اساتذہ مناوݨ اچ عالمی برادری دے رلے شریک ہیسے۔وزیر اعظم آکھیے اڄ دے ݙینھ اساں انھاں لوکاں کوں خراج تحسین پیش کریندوں جنہاں پاکستان دے مستقبل دی تشکیل اتے علم کوں ودھارا ݙیوݨ دے عظیم مشن کوں سر انجام ݙیوݨ دا ٻیڑا چاتے ۔وزیر اعظم آکھیے درحقیقت کہیں ملک دی ترقی بنیادی طور تے ایندے افراد دی تعلیم نال جڑی ہوندی اے تے اے اساتذہ دی انتھک محنت ہی اے جیڑھے نینگر نسل اچ ترقی تے خوشحالی دی تحریک تے لگن پیدا کریندی اے ۔وزیراعظم آکھیے میں پاکستان دے سارے اساتذہ دا دلوں شکریہ ادا کرینداں جیڑھے آپݨے غیر متزلزل عزم نال نینگر ذہناں کوں سنوار ݙیندن ،او ساݙے مستقبل دے معمار ہن تے علم تے مبنی معیشت بݨݨ دے ساݙے مقصد سانڳے انھاں دی لگن ناگزیر اے،انھاں دیاں کوششاں دے بغیر اساں آپݨی انھاں امنگاں کوں پورا نی کرسڳدے جیڑھے اساں بحیثیت قوم اپݨے سانڳے متعین کر رکھئن ۔انہاں آکھیے حکومت پاکستان اساتذہ دےنال کیتے ڳئے آپݨے وعدے دی تکمیل سانڳے پرعزم اے ۔وزیراعظم آکھیے اساں ھک حوصلہ افزا تے چنڳی معاون تدریسی افرادی قوت دی اہمیت کوں منیندوں تے جدید انفراسٹرکچر اتے تعلیمی وسائل اچ سرمایہ کاری جاری رکھیسوں ۔ انھاں آکھیے ساݙا مقصد ھک اعلیٰ کارکردگی دا حامل تعلیمی نظام وضع کرݨا اے جیڑھے ساݙے طلبا تے اساتذہ ݙوہیں کوں تکھے بدلدی دنیا اچ ترقی دیاں منزلاں طے کرݨ دے قابل بݨا سڳے ۔وزیر اعظم آکھیے آؤ ،اساں اڄ تے ہر آوݨ آلے ݙینھ کوں آپݨے اساتذہ دے انتہائی اثر انگیز کردار دے طور تے مناؤں تے پاکستان دے مستقبل دے رہنماواں کوں تعلیم دے زیور نال آراستہ کرݨ تے انہاں دی حوصلہ افزائی کرݨ دے انھاں دے مشن اچ انہاں دی معاونت کرݨ دا آپݨا عزم کروں۔
