وزیراعظم سعودی نائب وزیراعظم کوں مقبوضہ جموں تے کشمیر وچ بھارتی مظالم بارے ڈسایا بھارتی فورسز مقبوضہ جموں تے کشمیر دی پوری ریاست کوں جیل بنڑا ڈتا ہے، وزیراعظم نواز شریف

نیویارک ۔ 20 ستمبر (اے پی پی) وزیراعظم محمد نواز شریف نال سعودی ولی عہد اتے سعودی عرب دے نائب وزیراعظم شہزادہ محمد بن نائف بن عبدالعزیز نیویارک وچ ملاقات کیتی، ملاقات وچ وزیراعظم دے مشیر برائے خارجہ امور سرتاج عزیز اتے سیکرٹری خارجہ اعزاز احمد چوہدری وی موجود ہن۔ ملاقات دے دوران ڈوہائیں رہنماواں پاکستان اتے سعودی عرب وچال چنگے ڈوطرفہ تعلقات تے اطمینان دا اظہار کیتا جڈانجو ڈوہائیں ملک امت مسلمہ دے ڈو اہم ستون وی ہن۔ وزیراعظم محمد نواز شریف سعودی عرب دی سلامتی اتے علاقائی سالمیت دے خلاف کہیں وی قسم دے خطرے توں تحفظ سانگے معاونت دے عزم دا اعادہ کیتا۔ وزیراعظم ملاقات دے دوران مقبوضہ جموں تے کشمیر وچ بھارتی مظالم بارے آگاہ کریندے ہوئیں آکھیا جو بھارتی مقبوضہ فورسز جموں تے کشمیر دی پوری ریاست کو ںجیل بنڑاڈتا ہے۔ وزیراعظم نواز شریف بھارتی حکومت دے حالیہ دھمکی آمیز بیاناں دا حوالہ ڈیندے ہوئیں آکھیا جو ایں قسم دے بیاناں نال پورے خطے دا امن تے استحکام خطرے وچ پئے ویسی ۔ وزیراعظم محمد نواز شریف ایں گالھ تے زور ڈتا جو بین الاقوامی برادری کوں مسئلہ دی شدت دا احساس کرنڑ چاہیدے اتے ایں سیاسی مسئلے کوں اقوام متحدہ دی سلامتی کونسل دیاں قرارداداں دے تحت کشمیری عوام دیاں امنگاں دے عین مطابق مذاکرات دے ذریعے حل کیتا ونجنڑ چاہیدے، ایں طرح کشمیری عوام کوں اپنڑی منزل دا خود فیصلہ کرنا ہے۔ وزیراعظم محمد نواز شریف او آئی سی اتے بئے اسلامی ملکاں تے زور ڈتا جوا وہ وادی کشمیر دے اپنڑے مسلمان بھینڑ بھراواںسانگے آواز اچی کرنڑجنہاں دے انسانی حقوق بھارتی سیکورٹی فورسز وحشیانہ طاقت دے استعمال نال پامال کر یندیاں پئیاںہن۔ وزیراعظم محمد نواز شریف سعودی ولی عہد کوں دہشتگردی دے خلاف پاکستان دے آپریشن ضرب عضب دی کامیابی دے نال نال ملک وچوں شدت پسندی کوں مکاونڑدے قومی ایکشن پلان تے پیشرفت بارے وی ڈسایا ۔ ڈوہائیں رہنماواں ایں عزم دااعادہ کیتا جو پوری مسلم امہ کوں شدت پسندی دے ایں خطرہ توں بچاونڑ سانگے اجتماعی طور تے کوششاں کرنڑن دی ضرورت ہے۔ ڈوہائیں پاسوں علاقائی صورتحال خصوصاً افغانستان وچ امن کوششاں دے نال نال شام، عراق اتے یمن دی صورتحال بارے وی خیالیں دا تبادلہ کیتا گیا۔ وزیراعظم محمد نواز شریف مسلم دنیا وچ ہم آہنگی اتے اتحاد پیدا کرنڑ دی ضرورت کوں اجاگر کیتا۔ ملاقات دے دوران توانائی دے شعبے وچ تعاون، اقتصادی تعلقات اتے سعودی عرب وچ پاکستانی کمیونٹی دے کردار جئے امور تے وی خیالیں دا تبادلہ کیتا گیا۔

مضمون کا ماخذ : لوٹیریا کے اعدادوشمار

متعلقہ مضامین