اسلام آباد۔29اکتوبر(اے پی پی)پاک فوج ابھینندن دی رہائی بارے بیان کوں گمراہ کن قرار ݙیندے آکھیے جو بھارتی پائلٹ ابھی نندن دی رہائی کوں کہیں بئی شے نال جوڑݨ بہوں گمراہ کن اے جیڑھا کہیں وی پاکستانی کیتے ناقابل قبول اے،پلوامہ واقعے اچ بھارت پورے جگ اچ بے نقاب تھئے اتے دشمن دے جہاز جیڑھے پاکستانی عوام دے بم مارنڑ آئے ہن او سنڄ پہاڑاں تے بم مار تے نس گین،جیندا ولدا پاکستان اعلانیہ ہندوستان کوں چٹے ݙینھ ݙتے اتے دشمن دے ڈو جہاز ݙھوائن، اللہ دی مدد نال ساکوں کامیابی ملی ہئی،اساں پائلٹ ابھی نندن پکڑیے اتے پوری قوم دا سر مانڑ نال اچیچا تھئے اتے ایں کامیابی کوں پورے جگ منیے۔ ہنگامی پریس کانفرنس اچ ڈی جی آئی ایس پی آر میجر جنرل افتخار بابر آکھیے جو اج دی پریس کانفرنس دا مقصد ون پوائنٹ ایجنڈا، ریکارڈ دی درستگی اے جو کل ہک بیان اچ تاریخ مسخ کرݨ دی کوشش کیتی گئی اے،پاکستان دے ویلھے نال ولدے اچ دشمن دے عزائم مٹی کیتے گین اتے افواج پاکستان قوم دے عزم و ہمت دے عین مطابق دشمن کوں سبق سکھاوݨ دا فیصلہ کیتے،ایں فیصلے اچ پوری سیاسی اتے فوجی قیادت ہک مٹھ ہئی۔انہاں آکھیے جو پاکستان دی کامیاب کارروائی پاروں بھارت پورے جگ اچ گندا تھئے،ایندے نال دشمن ایویں ݙریے جو ابڑغت اچ اپنڑا ہی ہیلی کاپٹر اتے جوان مار گھتن،ساݙی ایں کامیابی کوں جگ ہی نئیں اآپ بھارت وی منیے۔ ہک سوال دے ولدے اچ انہاں آکھیے جو پاکستان دی مسلح افواج ہک منظم ادارہ اے، ایندی قیادت اتے ریکنگ فائل اچ کوءی وی فاصلہ کائنی جو مسلح افواج ہک اکائی اے۔
