بھارت نال دوستانہ،پکے اتے مہذب تعلقات چاہندوں،ڈوہیں ملکاں اچ بنیادی تنازعہ کشمیر اے،امن سانگے پاکستان دی حکومت،سیاسی جماعتاں،فوج اتے سارے ادارے ہک جاہ تے ہن,وزیراعظم عمران خان دا کرتار پور راہداری دے سنگ بنیاد دی تقریب توں خطاب

APP96-28 KARTARPUR: November 28 - Prime Minister Imran Khan addressing the gathering at the groundbreaking ceremony of development of KartarPur Corridor. APP photo by Rana Imran

کرتارپور، نارووال۔ 28 نومبر (اے پی پی) وزیراعظم عمران خان آکھیا جو خطہ اچ امن سانگے بھارت ہک قدم چیسی تاں پاکستان ڈو قدم ودھیسی،اساں بھارت نال دوستانہ،پکے اتے مہذب تعلقات چاہندوں،ماضی دی زنجیراں کوں تروڑ کراہیں اگوں ودھنڑاں پمسی،ڈوہیں ملکاں اچ بنیادی تنازعہ کشمیر اے،ڈوہیں ملکاں دی قیادت دی قوت ارادی نال اے مسئلہ حل تھی سگدے،ڈوہیں ملکاں دی اصل قیادت کوں برصغیر دی غربت دی زنجیر اچ بدھی عوام دا سوچنڑاں چاہیدے،امن سانگے پاکستان دی حکومت،سیاسی جماعتاں،فوج اتے سارے ادارے ہک جاہ تے ہن ،کرتار پور کوں دور بین نال ڈیکھنڑ آلے گردوارہ دربار صاحب دی یاترا کر سگسن،سکھ برادری کوں ہرممکن سہولتاں ڈتی ویسی۔انہاں اے گالھیں بدھ کوں اتھاں کرتار پور راہداری دے سنگ بنیاد دی تقریب توں خطاب کریندیں ہوئیں آکھی۔۔ تقریب اچ گورنر پنجاب چوہدری محمد سرور، وزیراعلیٰ پنجاب عثمان بزدار، وفاقی کابینہ دے ارکان، آرمی چیف جنرل قمر جاوید باجوہ، صوبائی وزرائ، بھارتی پنجاب دے وزیر اتے سابق کرکٹر نوجوت سنگھ سدھو، بھارت دی وزیر ہرسمرت کور بادل، سکھ برادری دے ارکان اتے اعلیٰ حکام شریک تھیے۔وزیراعظم تقریب اچ شرکت کرنڑ آلے بندے خصوصی طور سکھ کمیونٹی دا خیر مقدم کریندیں ہوئیں آکھیا جو اج او سکھ کمیونٹی دے ارکان دے چہریاں تے جیڑھی خوشی ڈیکھدے پئن او اینویں اے جینویں کوئی مسلمان مدینہ توں 4کلومیٹر پرے ہووے تے پر او مدینے ونج نہ سگے اتے انہاں کوں مدینے ونجنڑ دا موقع ملے تاں انہاں دی جیڑھی خوشی ہوسے او اج سکھ کمیونٹی دے ارکان دے چہریاں تے ڈیکھدے پئن ۔وزیراعظم سکھ برادری کوں مخاطب کریندیں ہوئیں آکھیا جو پاکستان دی حکومت دربار صاحب کرتار پور کوں بہتر توں بہتر بنڑاونڑ سانگے اقدامات کریسی اتے اتھاں یاترا سانگے آونڑ آلے لوکاں کوں بہترین سہولتاں ڈیسن،آندے سال باباگرونانک دی 550ویں سالگرہ تقریبات دے موقع تے جڈاں آپ ایں علاقے کوں ڈیکھسو تاں تساں کوں خوشی تھیسی تاں اتھاں ہر قسم دی سہولتاں ملسن۔

مضمون کا ماخذ : loteria آن لائن confiável

متعلقہ مضامین