راولپنڈی۔8اکتوبر(اے پی پی)چیف آف دی آرمی سٹاف جنرل قمر جاوید باجوہ آکھیے جو پاک فوج قوم دی مکمل حمایت و اعتماد نال ݙو ݙھاکیاں اچ دہشت گردی دی لعنت دی لہر کوں کامیابی نال موڑ ݙتے اتے پاکستان توں منظم دہشت گردی دی پاڑاں پٹین، اے وݙا کارنامہ اے۔ آئی ایس پی آ ر آکھیا جو پاکستان ملٹری اکیڈمی کاکول اچ کیڈٹس دی پاسنگ آئوٹ تقریب نال خطاب کریندے جنرل قمر جاوید باجوہ آکھیے جو تہاکوں وی سمڄھݨا چاہیدے جو جزا اتے سزا سانڳے قابلیت ݙکھاوݨ آلا انصاف پسند اتے غیر جانبدار کمانڈر دی شخصیت ہی اپݨے ماتحت کمانڈر دی غیر مشروط وفاداری و اطاعت ݙیوا سڳدی اے، بطور ہک رہنما تہاکوں اوکھے فیصلے کرݨ اتے ول پوری ذمہ داری قبول کرݨ دی ہمت اتے صلاحیت دی لوڑھ اے، درست فیصلہ سازی کیتے اہلیت اتے اعتماد ضروری اے، اپݨے نینگراں اچ دائمی صلاحیت (توانائی) پیدا کرݨ کیتے تہاݙی زبانی رہنمائی نئیں ٻھل مثالی رہنمائی بنیادی طور تے لازم اے۔ انہاں آکھیے جو تہاݙے کیتے ملک دی حفاظت، عزت و فلاح و بہبود ہمیشہ اتے ہر ویلھے اڳونہی ہووݨی چاہیدی اے، تہاݙے زیر کمان عملہ جیکوں تساں حکم ݙیندے ہوو انہاں دی عزت، فلاح و بہبود اتے سکون ایندے بعد آندے۔ انہاں آکھیا جو ہمیشہ اتے ہر ویلھے تہاݙی اپݨے سوکھ، راحت اتے حفاظت چھیکڑی ہووݨی چاہیدی اے۔ جنرل قمر جاوید باجوہ آکھیے جو اساں اپݨی خودمختاری و سالمیت دی حفاظت کیتے جان اتے مال ݙوہیں قربانیاں ݙتن، اڄ اساں جتھاں ہیں ایندے کیتے ساݙے ہزاراں بہادر پتراں جان ݙتی اے، تہاݙا عہد کݙاھیں ݙھیلا نئیں پووݨا چاہیدا، مستقبل دے چیلنجز تے لگن نال قابو پاوݨ اتے جیت کیتے ہر ویلھے تیار ہیں۔ چھیکڑ تے انہاں دشمن کوں چتایا جو اے میݙا سنیہا ہے کہ ”مسلح افواج اپݨے شہریاں دی حمایت نال کہیں وی ملک، گروہ یا طاقت کوں پاکستان کوں سیاسی یا معاشی حوالے نال غیر مستحکم کرݨ دی اصلو اجازت نا ݙیسن۔
.jpg)
